Tēnā koutou i haere mai nei kāhore he aha i ō koutou ringa.  He kapua pōuri e tāpoki ana i ō koutou ngākau.  E taimahatia ana ngā tinana, ngā wairua me te hinengaro e pēhia kino ana e raupatu tonuhia ana e te whakamā.  Ko te īnoi i ō koutou ngutu. Whakaorangia mātou. 

Ko mātou ēnei i noho ki te whakarongo ki ngā wetewete o te mahara, ki te hotu a te manawa, ki te wherawhera i ngā kaikino o te wā. Ka wetewete nei i ngā nawe e here ana i tēnā me tēnā o koutou.  Kia tau ki a koutou ngā manākitanga a te wāhi ngaro, te māramatanga o ngā tau roa. Tērā hoki e riro ai mā te pono me te tika i whāia nei e tatou katoa. E whakatau te mauri.

Kāti, kia tahuri a tātou mihi ki te hunga kua kore nei e kite i te tutukitanga o tēnei hīkoi roa, rātou kua rūpeke ki tua o pae maumahara, ki te huinga o te kahurangi, ki te kukunetanga o te pō, haere rā koutou. E moe koutou i te atarau o te mate, i roto i te tauawhi ā ō tūpuna. Ō koutou reo kua ngū, ēngari ko ā koutou kupu ka mau tonu. Moe mai koutou.

I roto i taua moe, tērā he oranga ngākau mōu kei tēnei rīpoata.

Whanaketia – through pain and trauma from darkness to light - e mihi ana mātou mo te īngoa i tāpaia hei ūpoko kōrero e te roopu Survivor Advisory Group of Experts me ngā Pou Tikanga. He whakamaumahara tēnei īngoa mo te hīkoi ā ngā purapura ora: mai te noho tāhanga, huna, me te kore e rāngona – kia rongohia, kia takihia ō rātou wheako, arā ināianei kia tiaho iho, ko te ora, e tau mai anō ai ko te pai.

Ka whakairi tēnei rīpoata ki te nui ō ngā mahi tūkino i ngā pūnaha taurima ā-kāwangatanga, ā-whakapono i Aotearoa. Ka aro ki ngā wheako ō ngā purapura ora, ngā mahi taurekareka i ūhia ki runga i ā rātou, ō rātou whānau, hāpori hoki.

E whakamānawa ana mātou ki te katoa o ngā purapura ora, whānau, hapū, iwi, hāpori me ngā kōtuinga tautoko i kōkiri, i whai wāhi rānei ki tēnei Pakirehua mō tō rātou titikaha, manawanui hoki.

E mihi ana mātou ki te hunga i tuku kōrero i hora i ō rātou wheako. Kāhore he mea i eke mei kore mō tō whai wāhi mai. Tē tāea te whakairi ēnei kitenga me ēnei whakatau, e hua ai he pāpori e tauawhi ana i te hunga takitahi ā-whānau, ā-hāpori rānei e puāwai ai te mauri tangata, me tōnā mana motuhake. E whakawhetai ana mātou mō koutou i whakaoho anō i ngā takakino ō tō ao, hei whakahere kia eke o manako mō ō mokopuna me ngā whakatupuranga kei te heke tonu mai. 

E mōhio ana mātou mō ētahi purapura ora, ko te wā tuatahi tēnei i horahia ai ō rātou wheako. I rongo mātou i ō koutou reo ka whai ki te whakairi i ō koutou wheako katoa ki roto i tēnei rīpoata. E mōhio ana mātou kīhai i oti tika i a mātou i ngā wā katoa. I ako mātou i te ara i takahia i a mātou e wherawhera e kohikohi kōrero ana.

E mihi ana hoki mātou ki ngā purapura ora kīhai i āhei ki te tomo mai, nā te mea kua kore e whakapono ki ngā mana whakahaere, nā te nui o ngā mahi tūkino, me tō rātou kore hoki e hiahia ki te kōrero mō ngā mea i pā ki a rātou.

Ka whakamānawa hoki mātou i te tirohanga kanohi, ētahi nā te whakamomori, ētahi i te wā ō te Pakirehua. E mihi ana mātou ki a rātou, ki ō rātou whānau, me ō rātou hoa.

E whakamānawa ana mātou ki ngā kaimahi o mua, o ināia tonu nei, o ngā tari Kāwanatanga, whakapono hoki. I toko ake ki te hora i ō rātou wheako. Ngā mātanga me ngā kaikōrero i hora ai i ō rātou pukenga ki ngā mahi tūkino i ngā pūnaha taurima, e tohe tonu nei, kia hua he kaupapa pai ake, mai ra anō. E whakamānawa ana mātou i ngā kaikōkiri, kaitautoko, ngā whānau, ngā kaiārahi ā-hāpori, ā-iwi, ā-Māori hoki. Ki ētahi atu iwi me ngā roopu i whakapau tāima, kaha rānei i roto i ngā tau, kia tū tēnei Pakirehua kia hua he puretumu me te whakapahā ki ngā purapura ora. I whakarongo, i whakapono rātou ki ngā purapura ora, i petihanatia, i tū ake, ka tautoko i ā rātou. He maha rawa hei whakaīngoa, ēngari kāhore he hua o tēnei Pakirehua mei kore tō rātou manawanui, tohe kaha kia hora tūmatanuitia ēnei mahi tūkino i ngā pūnaha taurima, i pokea ai te arawhānui puta noa i Aotearoa.

E whakamānawa ana mātou ki ngā Pou Tikanga mō ā rātou tohutohu ki tēnei Pakirehua, mō te toha i ō rātou mātauranga Māori hei āwhina i a mātou ki te whakaraupapa i tēnei rīpoata e hāngai ai ki te tikanga Māori, me te whai tonu kia tōtika hoki ngā kaupapa takinga kōrero. Ngā wāhanga tikanga Māori, ngā karakia, me ngā waiata, nā koutou i tito ka tākoha mai ai, te reo me ngā īngoa Māori i whiri ki ia wāhanga, i whai mana ai te whakairi i ngā wheako me ngā whakataunga kōrero puta noa i tēnei rīpoata. He rawe tonu!

E mihi nui ana mātou ki te roopu Survivor Advisory Group of Experts, Te Taumata, Te Ara Takatū, te Royal Commission Forum, me ā mātou Report Reference Groups, mō ā koutou tohutohu whiringa aroha mai. He nui tā koutou tautoko mai me te pono ō ā koutou kōrero. I whakaae koutou ki te kōrero pono me te āta wherawhera i ā mātou pūnaha, ā mātou whakahaere, hei wero i ō mātou hinengaro. Tēnā koutou, mō te whakaaro nui, me te tūturu ō ā koutou kawenga, tohutohu mai.

E whakamānawa ana mātou ki ngā kaikōmihana o mua, ki a Sir Anand Satyanand, GNZM, QSO, KStJ, ki a Julia Steenson, ki a Judge Ali’imuamua Sandra Alofivae, MNZM mō ā rātou pukenga, manawanui, mātauranga i pakari ai ā mātou pūnaha, ā mātou whakahaere ā mātou ahua mahi, aronga whakaaro hoki. E mihi ana ki tā koutou i ōha mai.

E mihi ana ki a mātou kaitohutohu motuhake, ki a Professor Tracey McIntosh, MNZM and Associate Professor Tamasailau Suaalii-Sauni, MNZM. E mihi ana ki ō kōrua mātauranga me ngā tohutohu nā kōrua i ōha mai.

E whakamānawa ana mātou ki ā mātou kaimahi, me ngā pukenga ā-ture, i āwhina nei i tēnei Pakirehua. Ki tā mātou tari, me ōna kaiārahi i roto i te wā, ki a Mervin Singham, Helen Potiki me Benesia Smith, MNZM. Tēnā me tēnā i kawe mai i ō rātou pukenga hei arataki i ngā kaimahi huhua nei ngā tohu e kawe tōtika i ngā mahi whānui. He rawe tonu tā rātou tautoko i ā mātou mahi. Tēnā koutou Mervin, ko Helen, ko Benesia. E whakawhetai ana mātou ki te nui o tā koutou tautoko mai.

E mihi ana mātou ki a Simon Mount KC me Kerryn Beaton KC, ā mātou rōia matua, i āwhina nei i tēnei Pakirehua. Ko tā kōrua arataki i te tira rōia nui, i eke ki ngā taumata rawa o te ture. Nā kōrua i tautoko ā mātou whāinga katoa, tēnā kōrua Simon me Kerryn. E mihi ana ki tā kōrua i ōha mai.

Ki ngā kaimahi me ngā rōia i te tīmatatanga o tēnei Pakirehua i te tau 2018, tae noa ki tēnei wā, e mihi ana mō ā koutou mahi manawaroa, hei tautoko i ngā purapura ora ki te taki i ō rātou wheako, i mau ai ki ngā rīpoata o mua ake tae noa mai ki tēnei.

Hei mihi mutunga mā mātou, e whakamānawa ana mātou ki te katoa ō Aotearoa, i whai wāhi i tautoko mai i tēnei Pakirehua. He mea tōtiki tonu, kia whai pānga tātou katoa o Aotearoa, ki ngā mea i hua, te take i hua ai, te murunga o aua hapa, me te waihanga i te ara, e kore anō ai ēnei mea e hua ake anō a muri ake nei. Kua mōhio nei tātou e hia mano tamariki, hunga taiohi, tai pakeke hoki i tūkinohia i roto i ngā pūnaha taurima ā-kawanatanga, ā-whakapono rānei. I tōna wā he maha tonu ngā kaitūkino puta noa i ngā whakatupuranga. He wāhi kei tēnā kei tēnā i Aotearoa nei hei tohe kia kaua anō e pā mai ēnei mahi.