E tāmara mā, koutou te pūtake o ēnei kōwhiringa, kua horaina nei
E tohe tonu nei i te ara o te tika
E ngaki tonu ana i te māra tipu
Anei koutou te whakairihia ki te tihi o
Maungārongo, kia tau te mauri.

Rukuhia te pū o te hinengaro
kia tāea ko te kukunitanga mai o te whakaaro nui.
Kia piere ko te ngākau mahora
kia tūwhera mai he wairua tau.

Koinei ngā pou whakairinga i te tāhuhu
o te Whare o Tū Te Mauriora.
Te āhuru mōwai o Te Pae o Rehua,
kaimuru i te hinapōuri,
kaitohu i te manawa hā ora,
kaihohou i te pai.

Nau mai e koutou kua uhia e ngā haukino
o te wā, kua pēhia e ngā whakawai a ngā tipua nei,
a te Ringatūkino rāua ko te Kanohihuna.

Koutou i whītiki i te tātua o te toa,
i kākahu i te korowai o te pono,
i whakamau i te tīpare o tō mana motuhake,
toko ake ki te pūaotanga o te āpōpō e tatari mai nei i tua o te pae,
nōu te ao e whakaata mai nei.

Kāti rā, ā te tākiritanga mai o te ata,
ā te huanga ake o te awatea,
kia tau he māramatanga,
kia ū ko te pai, kia mau ko te tika.
Koinei ko te tangi a te ngākau e Rongo,
tūturu ōwhiti whakamaua
kia tina, tina!
Hui e, tāiki e!

– Waihoroi Paraone Hōterene

To you upon whom this inquiry has been centered
Resolute in your pursuit of justice
Relentless in your belief for life
You have only our highest regard and respect,
may your peace of mind be assured.

Look into the deepest recesses of your being
and discover the seeds of new hope,
where the temperate heart might find solace,
and the blithe spirit might rise again.

Let these be the pillars on which the House of Self,
reconciliation can stand.
Safe haven of Rehua,
dispatcher of sorrow,
restorer of the breath of life,
purveyor of kindness.

Those of you who have faced the ill winds
of time and made to suffer,
at the hands of abusers and the hidden faces of persecutors, draw near.

You who found courage,
cloaked yourselves with your truth,
who crowned yourself with dignity,
a new tomorrow awaits beyond the horizon,
your future beckons.

And so, as dawn rises, and a new day begins,
let clarity and understanding reign,
goodness surrounds you and
justice prevails.
Rongo god of peace, this the heart desires,
we beseech you,
let it be,
it is done.

– Waihoroi Paraone Hōterene