Ka koke tonu ā mātou mahi i a mātou e aro nui atu nei ki ngā wheako motuhake o te Māori, o ngā uri o Te Moana-nui-a-Kiwa, o te hunga Turi me te hunga hauā, me tā ētahi purapura ora whai wāhi ki ētahi o ēnei karangatanga.

He āwhina ngā tūhuratanga kia mōhio ai mātou he aha ētahi atu mea me whai e tika ai tā mātou tuku puretumu torowhānui whai hua mō ngā tūkinotanga, ngā whakatūrorotanga me ngā pāmamaetanga nā ngā wāhi me ngā tōpūtanga e taurima ana. Mā ēnei kōrero e puta ai pea ētahi tūtohitanga anō.

Heoi anō, me tīmata ināianei ngā mahi whakakōpani i ngā pūnaha puretumu huakore o nāianei a te Karauna me ngā wāhi whakapono, me te whakatū anō hoki i tētahi pūnaha puretumu torowhānui hou, me tētahi kaupapa hou kia wātea ai ki ngā purapura ora ētahi huarahi whakahaumanu mana, oranga anō hoki.

Kua roa rawa te tatari a ngā purapura ora me ō rātou whānau, ō rātou pou whakawhirinaki, ō rātou hapū, iwi anō hoki kia whāia ai he urupare tika ki ngā tūkinotanga, ngā whakatūrorotanga me ngā pāmamaetanga i pā ki a rātou. Nā konei i kino kē atu ai te pākikini. He nui ngā purapura ora i mate i te wā o te tatari. Ko ngā mahi whakatū i tētahi pūnaha puretumu torowhānui hou, me tētahi kaupapa hou whai hua hoki, me tīmata i tēnei wā tonu nei.