Te mahitahi me te Māori

5.  Me whakatū, me utu hoki te Karauna i tētahi Rōpū Māori motuhake, ka whai rauemi-maha, kī ana i ngā Māori me ngā pūkenga hāngai, wheako matawhaiaro rānei, ā, e whakakanohi ana i tētahi hanumitanga o ngā purapura ora, ngā whānau, ngā hapū me ngā iwi, ngā rōpū whakahaere iwi-whānui me ngā taura here, ka mutu, me whānui hoki ngā ira, te hunga LGBTQIA+, ngā rangatahi me te hunga Turi, hauā anō hoki kia:

• ārahi i te waihangatanga o te kaupapa puretumu torowhānui
• mahitahi ki ngā purapura ora, te Rōpū Purapura Ora, ngā hapori purapura ora (ngā hapori Māori, ngā uri o Te Moana-nui-a-Kiwa, te hunga Turi me te hunga hauā hoki) me ētahi atu rōpū e hāngai ana hei whanake i tētahi mahere ki te whakatinana i ā mātou tūtohitanga, pēnei i:
  • te whakatū i tētahi kaupapa puretumu, ko te tūāpapa ko te tikanga Māori
  • te whanake i te hātepe mō te tono puretumu torowhānui
  • whakatau i ngā tautokotanga me ngā ratonga e tika ana hei urupare i te tūkinotanga, hei whakapūmau i te mana, hei whakatutuki hoki i te utua kia ea
  • whai whakaaro ki ngā panonitanga whakaea nawe e whakaarotia ana
• mahitahi ki ngā purapura ora Māori, ngā whānau, ngā hapū me ngā iwi hei:
  • rangahau mēnā e tika ana kia whakatū i tētahi kaupapa puretumu motuhake mō te Māori
  • whakatau i te āhua, te wā me ngā take o tētahi whakapāha, o ngā whakapāha rānei, ki te Māori mō ngā tūkinotanga i te wā o te noho taurima, me te āhua o ngā maumaharatanga ki te hunga i tūkinotia
• tono i ētahi rīpoata, arotakenga, kōrero mātanga rānei e hāngai ana ki ngā wāhi whaitake o te waihangatanga o te hātepe me te kaupapa puretumu
• torowhānui, pēnei i tētahi arotakenga mātanga o ngā ratonga oranga (tirohia te tūtohitanga 68)
• whanake i ngā mahi i roto i tēnei uiui mā te whai i te urupare tika ki ngā whakatūrorotanga i wheakohia e ngā Māori i te wā o te noho taurima hei whakahaumanu i te mana, te tapu me te mauri
• mahitahi ki te Karauna me te whakaae ki ngā take o ngā tuhinga hukihuki ture me whai wāhi mai hei whakamana i ngā tūtohitanga kua rārangihia mai i roto i tēnei rīpoata.

Ka whai wāhi mai ngā purapura ora, ā, ka pāhekoheko hoki te Karauna ki te wānanga i ngā panonitanga

6.  Me kaha tā te Karauna pāhekoheko, mahitahi hoki ki ngā purapura ora mō te waihangatanga me te whakahaeretanga o te pūnaha puretumu torowhānui, kaupapa anō hoki me te whakatinana i ngā tūtohitanga i tēnei rīpoata me ētahi atu rīpoata ka tūpono puta i tēnei uiui. Ka whai wāhi mai ko te whakatū me te utu i tētahi Rōpū Purapura Ora motuhake ka whakamahi i ngā tāngata me ngā pūkenga, ngā wheako hoki e hāngai ana, o te hauātanga hei:

• kōkiri mā ngā purapura ora i te wā o ngā whakataunga a te Karauna e pā ana ki ā mātou tūtohitanga
• whakatūturu i te whakaaro i waihangatia te pūnaha puretumu torowhānui, me ta kaupapa anō hoki i te tirohanga o ngā purapura ora
• tono, i te taha o te Rōpū Māori, te arotakenga mātanga o ngā ratonga oranga.

7.  Me pāhekoheko tahi te Karauna ki ngā purapura ora, ngā mātanga me ētahi atu tāngata e hiahia ana, pēnei i:

• Ngā uri o Te Moana-nui-a-Kiwa: kia mōhio me pēhea te hanga, te whakahaere hoki i te kaupapa puretumu torowhānui kia hāngai ki ngā ahurea o ngā uri o Te Moana-nui-a-Kiwa, me te whai wāhi mai o tā te kaupapa me te pūnaha whānui whakauru i ngā mātāpono nō ngā hātepe whakaora a ngā uri o Te Moana-nui-a- Kiwa pēnei i te ifoga, te fakalelei, te isorosoro me te ho’oponopono
• Te hunga Turi, hauā hoki: kia mōhio ki te pānga o te waihangatanga me te whakahaeretanga o te kaupapa ki ngā herenga a Aotearoa i te United Nations Convention on the Rights of Persons with Disabilities me te New Zealand Disability Strategy
• He topenga o ngā purapura ora me ngā mātanga: kia mōhio ki ngā āhuatanga mahitahi o te kaupapa mō ngā momo tāngata maha, pēnei i ngā rangatahi me te hunga LGBTQIA+.

8.  Me pāhekoheko hoki te Karauna ki ngā wāhi whakapono, ki ngā kaiwhakarato taurimatanga motuhake a te Karauna me ētahi atu rōpū kei te pirangi kuhu mai me te hākerekere.

He ahunga pūnaha

9.  Me whai te Karauna i tētahi aronga pūnaha whānui hei urupare i te tūkinotanga i te wā o te noho taurima.